Eldar Tofiq oğlu Quliyev1941-ci il yanvarın 18-də Bakı şəhərində anadan olmuşdur. Orta məktəbi bitirdikdən sonra o, 1958-1959-cu illərdə “Azərbaycanfilm” kinostudiyasında rejissor köməkçisi işləmiş, 1960-1966-cı illərdə Moskvada, Ümumittifaq Dövlət Kinematoqrafiya İnstitutunda kino rejissoru ixtisası üzrə ali təhsil almışdır.

Eldar Quliyev 1967-ci ildən taleyini “Azərbaycanfilm” kinostudiyası ilə bağlayaraq ömrünün sonunadək burada çalışmışdır. O, 1987-ci ildən “Azərbaycanfilm” kinostudiyası nəzdində “Debüt” eksperimental-gənclik yaradıcılıq studiyasının bədii rəhbəri olmuş, 1999-cu ildə Azərbaycan Professional Kinorejissorlar Gildiyasının prezidenti seçilmişdir.

Dünya kinematoqrafiyasının nailiyyətlərindən və qabaqcıl təcrübəsindən daim bəhrələnən Eldar Quliyev Azərbaycanın kino salnaməsinə yeni səhifələr yazmışdır. Sənətkarın ideya dərinliyi ilə seçilən, ictimai-siyasi hadisələr fonunda insan mənəviyyatının təhlilini xüsusi diqqətdə saxlayan və xeyirxahlıq, məsuliyyət, humanizm aşılayan zəngin yaradıcılığı mədəniyyətimizin qızıl fondunda layiqli yer tutur. Eldar Quliyevin “Bir cənub şəhərində”, “Sevinc buxtası”, “Babək” və “Nizami” kimi parlaq ekran əsərləri, eləcə də çox sayda digər bədii və sənədli filmləri Azərbaycan kinematoqrafiyasının nailiyyətləridir.

Məzmun rəngarəngliyi və mövzu aktuallığı, fəal vətəndaşlıq mövqeyi və müasirlik duyğusu, obrazların incə psixologizmi və hadisələrin həyatiliyi Eldar Quliyev sənətinin özünəməxsus cəhətlərini təşkil edir. Yaradıcılıq palitrası rəngarəngliyi ilə səciyyələnən sənətkar tamaşaçını ayrı-ayrı dövrlərin müasirinə çevirməyi bacarırdı. Onun xalqımızın keçmişinə ehtiram ifadə edən tarixi filmlərinin milli-mənəvi dəyərlərimizin təbliğində və gənc nəslin Vətənə sədaqət ruhunda tərbiyəsində əhəmiyyətli rolu vardır.

Böyük rejissorluq məharəti Eldar Quliyevə ölkəmizin hüdudlarından kənarda da geniş şöhrət gətirmişdir. Onun quruluş verdiyi, həmçinin ssenari müəllifi olduğu filmlər beynəlxalq kinofestivallarda Azərbaycan mədəniyyətini uğurla təmsil etmiş, sənətşünaslar və tamaşaçılar tərəfindən rəğbətlə qarşılanmışdır. Eldar Quliyev Azərbaycan Dövlət Mədəniyyət və İncəsənət Universitetinin professoru kimi uzun illər səmərəli pedaqoji fəaliyyət göstərmiş, rejissorların bir neçə nəslinin yetişdirilməsi işində qüvvəsini, bilik və bacarığını əsirgəməmişdir.

Eldar Quliyevin Azərbaycan mədəniyyətinin inkişafındakı xidmətləri dövlət tərəfindən yüksək qiymətləndirilmişdir. O, “Əməkdar incəsənət xadimi” və “Xalq artisti” fəxri adlarını almış, respublika Dövlət mükafatına və “Azərbaycan Respublikası Prezidentinin fəxri diplomu”na layiq görülmüş, müstəqil Azərbaycanın ali mükafatları olan “Şöhrət”, “Şərəf” və “İstiqlal” ordenləri ilə təltif edilmişdir.

Eldar Tofiq oğlu Quliyev 2021-ci il aprelin 16-da ömrünün 81-ci ilində vəfat etmişdir.

Tövsiyə edilən ədəbiyyat:

1. Əbdülrəhmanlı, Nəriman Hacı oğlu. Azərbaycan kino sənəti tarixi : (4 cilddə) : [monoqrafiya] /N. Əbdülrəhmanlı ; [layihə. rəhb. R. İbrahimbəyov] ; red. Z. İsmayılova ; nəşrinə məsul Əli İsa Cabbarov ; vizual material. üzrə məsləhətçi N. Abbas ; foto təminatı: P. Quliyev, N. Ələkbərov, R. Qasımov ; qapaq dizaynı R. Həsən ; [Azərbaycan Kinomatoqrafçılar İttifaqı]. C. 3. Bölmə 4 Azərbaycan kinosu: inkişaf ənənələri və janr müxtəlifliyi (1961-1991-ci illər). - Bakı: [Qanun], 2020. - 629 s.
2. Əbdülrəhmanlı, Nəriman Hacı oğlu. Azərbaycan kino sənəti tarixi : (4 cilddə) : [monoqrafiya] /N. Əbdülrəhmanlı ; [layihə. rəhb. R. İbrahimbəyov] ; red. Z. İsmayılova ; nəşrinə məsul Əli İsa Cabbarov ; vizual material. üzrə məsləhətçi N. Abbas ; foto təminatı: P. Quliyev, N. Ələkbərov, R. Qasımov ; qapaq dizaynı R. Həsən ; [Azərbaycan Kinomatoqrafçılar İttifaqı]. C. 4. Bölmə 5 Azərbaycan kinosu inkişaf müstəqillik dövründə (1991-2018-ci illər). - Bakı: Qanun, 2020. - 719 s.
3. Kazımzadə, Aydın Ələsgər oğlu. Azərbaycan kinosu: 1898-2002: [2 сilddə] /A. Kazımzadə; Azərb. Resp. Mədəniyyət Nazirliyi; elmi red. İ. Rəhimli, A. Salayev. I cild. - Bakı: Nağıl evi, 2003. - 239 s.
4. Kazımzadə, Aydın Ələsgər oğlu. Azərbaycan kinosu: 1898-2002: [2 сilddə] /A. Kazımzadə; Azərb. Resp. Mədəniyyət Nazirliyi; elmi red. İ. Rəhimli, A. Salayev. II cild. - Bakı: Nağıl evi, 2003. - 372 s.
5. Sadıxov, Nazim. Azərbaycan kino rejissorları : Portretlər /N. Sadıqov ; red. S. İsmayılova ; rəyçi. F. Səfiyev. - Bakı: İşıq, 1988. - 157 s.